Stuðningsfulltrúi

Lýsing: Námið er ætlað að veita einstaklingum sem starfa við hlið og undir stjórn kennara starfstengda menntun. Stuðningsfulltrúar starfa flestir í grunnskólum en einnig í framhaldsskólum og felast verkefni þeirra í að vera kennurum til aðstoðar við að sinna nemendum sem þurfa á sérstökum stuðningi að halda. Starfið miðar að því að auka færni og sjálfstæði þessara nemenda félagslega, námslega og í daglegum athöfnum. Það felur í sér að aðstoða þá við virka þátttöku í skólastarfi, að ná markmiðum sem skólinn setur um námsframvindu, styrkja jákvæða hegðun og sjá til þess að þeir fylgi reglum um hegðun, umgengni og vinnubrögð. Stuðningsfulltrúar vinna oft eftir sérstakri áætlun sem kennari, sérkennari og/eða sálfræðingur hafa gert fyrir einstaka nemendur þar sem staða þeirra kemur fram og hvaða markmiðum er stefnt að hverju sinni.
Námið er góður undirbúningur fyrir þá nemendur framhaldsskóla sem stefna á kennaramenntun á háskólastigi. 

Inntökuskilyrði: Til þess að geta hafið nám á námsbraut fyrir stuðningsfulltrúa í skólum þurfa nemendur að hafa lokið námsmarkmiðum grunnskóla með lágmarksárangri. Í stærðfræði, íslensku og ensku skulu nemendur hafa hlotið einkunnina C eða hærri.

Skipulag: Námsbraut fyrir stuðningsfulltrúa í skólum er skipulögð sem fimm anna nám. Námið samanstendur af áföngum sem styrkja persónulega hæfni nemenda og almennri þekkingu en þegar á líður eykst hlutfall sérgreina og á síðustu tveimur önnunum koma til starfsþjálfunaráfangar sem m.a. fara fram í formi vinnustaðanáms. Til þess að koma til móts við þarfir fólks með langa starfsreynslu er boðið upp á svokallað brúarnám á stuðningsfulltrúabraut þar sem raunfærni og starfsreynsla er metin til styttingar á námi í samræmi við reglur sem menntamálaráðuneytið setur.

Námsmat: Leitast er við að mynda sterka tengingu milli námsmats og kennsluhátta og að gera námsmat eins samofið náminu og kostur er. Tilgangur námsmats er tvíþættur: Annars vegar að kanna að hve miklu leyti nemandi hefur tileinkað sér þau viðmið um þekkingu, leikni og hæfni sem sett eru í einstökum námsáföngum en hins vegar gagnast matið nemanda við að meta stöðu sína og gengi í námi. Umfang þess er að jafnaði í samræmi við umfang náms í viðkomandi áfanga.

Starfsþjálfun: Vinnustaðanám er mikilvægur þáttur náms stuðningsfulltrúa í skólum. Markmið náms á vettvangi er að gera nemanda kleyft að auka hæfni sína með því að hagnýta þá þekkingu og leikni sem hann hefur öðlast í námi sínu innan veggja skólans. Því skal vinnustaðanám taka tillit til viðmiða stuðningsfulltrúabrautar um þekkingu, leikni og hæfni. Nánari grein er gerð fyrir inntaki og sérstöðu vinnustaðanáms í áfangalýsingum (VAPÓ2VN15 og VAPÓ3FR5).

Hæfniviðmið: Að loknu námi skal nemandi hafa hæfni til að ...

• aðstoða börn og unglinga með sérstakar þarfir innan og utan kennslustunda og vinna samkvæmt einstaklingsáætlunum.
• gera sér grein fyrir mikilvægi fagmennsku þegar um er að ræða aðstoð við börn með sérþarfir.
• átta sig á hvernig gildandi lög og reglur, þ.m.t. aðal- og skólanámskrá, hafa áhrif á starf og fagmennsku stuðningsfulltrúa.
• koma til móts við þarfir barna og unglinga fyrir umhyggju, heilbrigði og öryggi og vera þeim góð fyrirmynd.
• stuðla að uppbyggilegum samskiptum í skólastarfi og leysa úr ágreiningi.
• bera kennsl á vanlíðan eða erfiðleika barna og unglinga og taka á þeim sjálfstætt eða í samvinnu við annað starfsfólk skóla og/eða foreldra viðkomandi nemanda.
• eiga góð samskipti við börn, foreldra og starfsfólk skóla og leysa úr ágreiningi.
• tjá sig á einfaldan og skýran hátt á erlendu tungumáli.
• veita fyrstu hjálp ef slys eða óhöpp verða á vinnustað.
• vinna samkvæmt lögum og reglugerðum sem starfið byggist á.
• bera virðingu fyrir grundvallarreglum starfsumhverfis, sýna siðgæði og virða trúnað.
• eiga fagleg samskipti við ólíkar starfsstéttir.
• tjá skoðanir sínar á ábyrgan og gagnrýninn hátt.
• vera meðvitaður um mikilvægi heilbrigðis og öryggis á vinnustað.