Fyrirkomulag fjarnáms

Hægt er að stunda nám í flestum áföngum sem kenndir eru við skólann í fjarnámi. Kennslan fer fram í kennsluumhverfi Innu þar sem hver áffangi er með sitt svæði, eins og kennslustofa í netheimum þar sem nemandi er í tengslum við kennara sinn og nemendur.

Í FÍV er lögð áhersla á fjölbreytta kennsluhætti og fjölbreytt námsmat. Almennt eru ekki stór lokapróf en nemendur sem mæta að öllu jöfnu ekki í staðbundin hlutapróf og verkefni þurfa að ljúka staðbundnu lokaprófi. Lokapróf eru í lok hverrar annar. Lokapróf á haustönn eru í desember, lokapróf á vorönn eru í maí. Hægt er að taka lokapróf í heimabyggð nemenda út um allan heim.

Allir áfangar skólans eru í kennslukerfi Innu. Kennslukerfið er nokkurs konar skóli í netheimum, þar sem hver áfangi á sér samastað. Nemendur komast þar í samband við kennara áfangans og samnemendur. Þar eru vistuð ýmis námsgögn, svo sem textar, hljóðskrár, myndbandsskeið, námsáætlanir, gagnvirk verkefni og fleira.

Í sérhverjum áfanga er að finna:

• Nákvæm námsáætlun sem er í samræmi við áfangalýsingu á netinu.
• Vikuleg áætlun um yfirferð námsefnis.
• Nákvæm lýsing á verkefnum og skilatíma þeirra.
• Samsetning námsmats.

Í Innu setur kennarinn inn það efni sem nemandinn þarf til námsins, svo sem:

• Námsáætlun
• Vikuáætlun.
• Námsefni- er fjölbreytt, bækur, tímarit, rafræn námsgögn á neti og vefsíður.
• Verkefni.
• Æfingar og próf.

Nemendur þurfa að skipuleggja tíma til námsins í samræmi við námsáætlun, nemendur geta fengið leiðbeiningar við námstækni.

Í kennslukerfinu er hægt að senda póst til kennara og samnemenda, taka þátt í umræðum og spjalli. Kennarar svara öllum fyrirspurnum innan tveggja virkra sólarhringa.