Leikskólaliði

Lýsing: Námið er ætlað að veita leiðbeinendum sem starfa við hlið og undir stjórn leikskólakennara starfstengda menntun. Námið veitir þekkingu og færni til að starfa með börnum í námi og leik. Áhersla er lögð á uppeldisfræði, sálfræði, listsköpun og notkun leikja.

Starf leikskólaliða snýst um umönnun, uppeldi og menntun leikskólabarna í samræmi við markmið aðalnámskrár fyrir leikskóla og einstakar skólanámskrár. Þeir taka þátt í daglegu starfi leikskóla og sinna fjölbreyttum verkefnum við að leiðbeina börnum við leik og störf og sinna daglegri umgengni og umsjón með leik- og vinnusvæðum, tækjum og búnaði. Leikskólaliðar sinna ýmsum kennslutengdum verkefnum, styðja við börn í leik og námi, annast öryggi þeirra og heilbrigði, sýna félagslegan stuðning þegar við á, aðstoða við daglegar athafnir, stuðla að jákvæðu uppeldis- og námsumhverfi, leggja til hagnýtar lausnir við bekkjarstjórnun, taka þátt í samvinnu heimilis og skóla og styðja við skipulag og framkvæmd leikskólastarfs.
Leikskólaliðar koma að vinnu með börnum sem þurfa á sérstökum stuðningi að halda til að styrkja ákveðna hegðun eða auka færni þeirra og sjálfstæði. Þetta gera þeir í samráði við og undir stjórn annars fagfólks leikskóla og því getur starf leikskólaliða haft í för með sér mikil samskipti og samstarf innan leikskóla og við foreldra þar sem upplýsingum um einstök börn er miðlað.

Skipulag: Námsbraut fyrir leikskólaliða er skipulögð sem fimm anna nám. Á síðustu tveimur önnunum sækja nemendur starfsþjálfunaráfangar sem meðal annars fara fram í formi vinnustaðanáms. Námsbrautin samanstendur af 26 áföngum sem samtals eru 120 einingar. Boðið er upp á námið í lotnubundnu dreifnámi sem sett er upp þannig að einn áfangi er tekinn fyrir í einu. 

Inntökuskilyrði: Til þess að geta hafið nám á leikskólaliðabraut þurfa nemendur að hafa lokið námsmarkmiðum grunnskóla með lágmarksárangri. Í stærðfræði, íslensku og ensku skulu nemendur hafa hlotið einkunnina C eða hærri.

Námsmat: Á leikskólaliðabraut er leitast við að mynda sterka tengingu milli námsmats og kennsluhátta og að gera námsmat eins samofið náminu og kostur er. Tilgangur námsmats er tvíþættur: Annars vegar að kanna að hve miklu leyti nemandi hefur tileinkað sér þau viðmið um þekkingu, leikni og hæfni sem sett eru í einstökum námsáföngum en hins vegar gagnast matið nemanda við að meta stöðu sína og gengi í námi. Umfang þess er að jafnaði í samræmi við umfang náms í viðkomandi áfanga.

Starfsnám: Vinnustaðanám er mikilvægur þáttur alls náms á leikskólaliðabraut. Markmið náms á vettvangi er að gera nemanda kleyft að auka hæfni sína með því að hagnýta þá þekkingu og leikni sem hann hefur öðlast í námi sínu innan veggja skólans. Því skal vinnustaðanám taka tillit til viðmiða leikskólaliðabrautar um þekkingu, leikni og hæfni. Nánari grein er gerð fyrir inntaki og sérstöðu vinnustaðanáms í áfangalýsingum (VAPÓ2VN15 og VAPÓ3FR05).

Námsframvinda: Til þess að nemandi standist áfanga þarf hann að hljóta einkunnina 5,0 

Hæfniviðmið:  Að loknu námi skal nemandi hafa hæfni til að ...

• eiga góð samskipti við börn, foreldra og starfsfólk leikskóla og leysa úr ágreiningi.
• gera sér grein fyrir eigin styrk- og veikleikum í samskiptum við börn, foreldra og starfsfólk leikskóla.
• vera börnum góð fyrirmynd og hlúa að þeim andlega og líkamlega.
• útskýra hvernig aðalnámskrá leikskóla og skólanámskrár eru notaðar í leikskólastarfi.
• vinna faglega að verkefnum tengdum kennslu undir stjórn leikskólakennara.
• tjá sig um einföld fagleg atriði við annað starfsfólk leikskóla og foreldra leikskólabarna.
• sinna umönnun, uppeldi og menntun barna sem þurfa á sérstökum stuðningi að halda og þekkja notkun sérkennsluáætlana.
• tjá sig á einfaldan og skýran hátt á erlendu tungumáli.
• veita fyrstu hjálp ef slys eða óhöpp verða á vinnustað.
• vinna samkvæmt lögum og reglugerðum sem starfið byggist á.
• bera virðingu fyrir grundvallarreglum starfsumhverfis, sýna siðgæði og virða trúnað.
• eiga í fagleg samskipti við ólíkar starfsstéttir.
• tjá skoðanir sínar á ábyrgan og gagnrýninn hátt.
• vera meðvitaður um mikilvægi heilbrigðis og öryggis á vinnustað.