VÉLV3VA04 - Viðhald véla - vélvirkjun

Lýsing

Viðhald véla – vélvirkjun

Einingafjöldi : 4

Þrep : 3

Nemendur öðlast þekkingu á undirstöðuatriðum í viðhaldi og viðgerð á brunahreyflum skipa og algengum vél- og drifbúnaði sem þeim tengist. Nemendur taka í sundur, skoða og setja saman vélar og vélbúnað.Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautarlýsingunni.

Þekkingarviðmið

Nemandi skal hafa öðlast þekkingu og skilning á:

  • uppbyggingu véla og samsetningu vélahluta.
  • aðferðum við að stilla saman vélar og vélbúnað.
  • hlutverki og uppbyggingu forþjöppu og gangráðs.
  • áhrifum hitabreytinga á þenslu vélahluta og hvernig brugðist er við þeim við hönnun vélbúnaðar.
  • aðferðum og efnum sem notuð eru til að steypa undir vélar og tæki.

Leikniviðmið

Nemandi skal hafa öðlast leikni í að:

  • meta ástand vélbúnaðar samkvæmt þjónustu- og viðhaldslýsingum framleiðenda.
  • mæla og skoða búnað með tilliti til slits og leggja mat á niðurstöður.
  • taka upp strokk og bullu meðalhraðgengrar dísilvélar og meta slit.
  • sveigjumæla sveifarás og leggja mat á slit í sveifar- og höfuðlegum dísilvéla.

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • vinna að upptektum á vélum og vélbúnaði.
  • mæla upp skipsskrúfu og leggja mat á niðurstöður.
  • leggja mat á dælur og dælikerfi sem þjónusta aflvélar með tilliti til viðhalds og upptektar.
  • sinna umhirðu tannhjóla og vökvagíra.
  • rétta af (lína saman) vél og drifbúnað.
  • meta ástand brunahreyfla út frá niðurstöðum athugana, svo sem þjöppumælingu og mælingu á smurolíuþrýstingi.