VÉLS2CV04 - Vélstjórn 3

Lýsing

Vélstjórn 3

Einingafjöldi : 4

Þrep : 2

Nemendur læra hvernig nota má teikningar, tæknilegar upplýsingar og vélherma til að öðlast víðtæka þekkingu á uppbyggingu einstakra vélarhluta og kerfa. Þeir kynnast eldsneytisolíum og kerfum, smurolíum og smurolíukerfum, krosshausvélum og langbulluvélum með tilliti til brennslu svartolíu og einnig notkun á mismunandi smurolíum. Nýting glatvarma frá vélum með varmaskiptum og afgaskötlum er kynnt. Nemendur öðlast þekkingu á tæringarvörnum ferskvatns- og sjókerfa um borð í skipum, þekkingu á framleiðslu ferskvatns, ásamt því að kynnast helstu gerðum skilvinda og læra um skilvindukerfi. Fjallað er um austurs- og kjölfestukerfi og þær reglur sem um þau gilda (MARPOL). Öll kerfi meðalhraðgengrar dísilvélar teiknuð upp með staðaltáknum og sömu kerfum er lýst fyrir hæggenga krosshausvél. Olíuverk eru skoðuð, prófuð og stillt. Meðalhraðgeng dísilvél keyrð, teknar af henni ritmyndir og lesið úr þeim. Vatnsröraketill kyntur upp og brunaloftið stillt eftir afgasgreiningu og eimkerfi hans teiknað. Nemendur kynnast vaktreglum STCW-samþykktarinnar og um skyldur vélstjóra við vaktstöðu, svo sem færslu vélabóka og skráningu upplýsinga um ástand vélbúnaðar. Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautarlýsingunni.

Þekkingarviðmið

Nemandi skal hafa öðlast þekkingu og skilning á:

  • nútímaeldsneytiskerfum sem hönnuð eru fyrir gasolíu- og svartolíu-meðhöndlun tilgangi hvers einstaks þáttar í kerfunum.
  • helstu eiginleikum eldsneytisolíu af mismunandi flokkum og grundvallaratriðum um skiljun.
  • smurolíukerfi og tilgangi hvers einstaks þáttar í kerfinu.
  • eiginleikum smurolíu af mismunandi flokkum og meðferð hennar við daglegan rekstur véla.
  • kælivatns- og sjókælikerfum og tilgangi hvers einstaks þáttar í kerfunum.
  • helstu eiginleikum fersk- og saltvatns til kælingar og meðhöndlun þess við daglegan rekstur véla.
  • helstu orsökum og skilyrðum tæringar í skipum og vélakerfum ásamt þeim aðgerðum sem beitt er til varnar tæringu.
  • gerð og uppbyggingu krosshausvéla.
  • ritmyndum og notkun þeirra til að meta þjöppun, innsprautunartíma eldsneytis og bruna.
  • helstu aðferðum við framleiðslu ferskvatns um borð í skipum.
  • þekkja helstu eiginleika austur- og kjölfestukerfa ásamt þeim hreinsibúnaði (austurskiljum) sem gerðar eru kröfur um.
  • þekkja alþjóðareglur sem gilda um störf vélstjóra og hafi kynnst vaktreglum STCW.

Leikniviðmið

Nemandi skal hafa öðlast leikni í að:

  • nota teikningar og leiðbeiningabæklinga til að átta sig á uppbyggingu vélahluta og búnaðar og hvernig þeir vinna.
  • útskýra tilgang einstakra þátta í eldsneytiskerfum með aðstoð teikninga.
  • rekja og átta sig á samhengi kerfa í vélarúmi.
  • teikna upp kerfi á staðlaðan hátt.
  • v inna með skjámyndir og skjáskipanir í vélarúmi.
  • útskýra algengar gerðir af tækjum sem notuð eru við ferskvatnsframleiðslu.
  • ræsa einfaldan eimketil til upphitunar.

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • annast rekstur skilvindukerfa í eldsneytis- og smurolíukerfum.
  • annast rekstur aðal- og ljósavéla í minni skipum og sinna öllu fyrirbyggjandi viðhaldi á þeim.
  • mæla og meta ástand kælivatns m.t.t. tæringar.
  • annast rekstur einfalds eimketils.