SMÍÐ1VA04 - Málmsmíðar 1 - handavinna
Lýsing
Málmsmíðar 1 - handavinna, grunnur
Einingafjöldi : 4
Þrep : 1
Nemendur skulu öðlast þjálfun í notkun og meðferð verkfæra, mælitækja og verkstæðisbúnaðar, fá tilfinningu fyrir nákvæmni mælitækja, notkunarsviði þeirra og takmörkunum. Nemendur fá þjálfun í smíði eftir teikningum og þekkingu til að velja smíðamálma og meðhöndla þá á réttan hátt við vinnu sína. Einnig þjálfast þeir í að beita helstu verkfærum við málmsmíðar og vinnuaðferðum, s.s. að saga, sverfa, bora, snitta, nota snitttöflur, slípa, o.s.frv. Kennslan skiptist í bóklegt og verklegt nám. Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautar-lýsingunni.
Þekkingarviðmið
Nemandi skal hafa öðlast þekkingu og skilning á:
- almennum skilgreiningum á járni, stáli, járnsteypu, ryðfríu stáli, áli og öðrum málmum.
- notkunarsviði, umhirðu og viðhaldi handverkfæra og tækja sem notuð eru til viðhalds og viðgerða á vélbúnaði.
- helstu mælitækjum sem notuð er í málmiðnaði til beinna og óbeinna mælinga.
- uppbyggingu og notkun spóntökuvéla.
- helstu aðferðum og verkfærum við málsmíðar.
- vinnsluhæfni smíðastáls, áls og ryðfrís stáls.
Leikniviðmið
Nemandi skal hafa öðlast leikni í að:
- vinna með handverkfærum og vélum.
- vinna eftir einföldum teikningum, smíði sem stenst öll mál.
- velja efni sem hentar smíði hverju sinni.
- beita mælitækjum, svo sem rennimáli, kastmæli og míkrómetra.
Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:
- velja öryggisbúnað sem hentar verkefnum og aðstæðum.
- lesa eiginleika málmtegunda úr efnisstöðlum.
- velja málmtegundir eftir stöðlum og ákveðið hvaða efni hentar best fyrir mismunandi aðstæður og notkun.
- segja til um herslumöguleika og herslueiginleika málma.
- velja samsetningaraðferðir (lóðun/suða, boltun, líming).
- velja tæki og búnað sem hentar mismunandi smíðaefnum.