RAMV1AV05 - Rafmagnsfræði 1
Lýsing
Rafmagnsfræði 1
Einingafjöldi : 5
Þrep : 1
Nemendur öðlast þekkingu á grundvallarhugtökum rafmagnsfræðinnar og verða færir um að gera útreikninga samkvæmt Ohms-, Kirchhoffs- og öðrum grundvallarlögmálum. Nemendur öðlast þjálfun í tengingum straumrása, í notkun mælitækja, læra að umgangast rafmagn og gera sér grein fyrir þeim hættum sem tengjast raforku og rafbúnaði. Nemendur skulu geta útskýrt grundvallarvinnumáta rafvéla og öðlast þekkingu á uppbyggingu þeirra. Í áfanganum eru gerðar verklegar æfingar til að auka skilning nemenda á námsefni áfangans. Í áfanganum eru gerðar verklegar æfingar til að auka skilning nemenda á námsefni áfangans. Kenna þarf áfangann samkvæmt STCW alþjóðasamþykktinni með viðeigandi vottun. Nám í áfanganum (og undanfarandi áföngum ef við á) skal samsvara þeim kröfum sem gerðar eru í tilteknum hlutum samþykktarinnar eins og nánar er tilgreint í tilvísanalista sem fylgir námsbrautarlýsingunni.
Þekkingarviðmið
Nemandi skal hafa öðlast þekkingu og skilning á:
- grundvallarhugtökum rafmagnsfræðinnar og lögmálum Ohms, Kirchhoffs o.fl.
- rafeindakenningunni.
- mismunandi leiðni mismunandi efna í rafbúnaði.
- viðnámi og spennutapi í rafleiðurum.
- uppbyggingu, virkni, notkun og umhirðu rafgeyma.
- skautspennu, innri spennu, innra viðnámi og skammhlaupsstraumi spennugjafa.
- ræsibúnaði og tengingum einfaldra rafmótora fyrir jafnstraum.
- undirstöðuatriðum riðstraumsrása og í raflögnum húsa.
Leikniviðmið
Nemandi skal hafa öðlast leikni í að:
- meta gerðir strengja og val á rafstrengjum m.t.t. straumflutningagetu og umhverfisaðstæðna.
- nota teikningartákn íhluta rafbúnaðar.
- teikna og útskýra einfaldar jafn- og riðstraumsrásir.
- meta hættur af völdum rafmagns.
- greina mikilvæg öryggisatriði samkvæmt öryggisstöðlum IEC og VDE.
Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:
- reikna samkvæmt lögmálum Ohms, Kirchhoffs og Watts.
- hirða um rafgeyma á viðeigandi hátt.
- teikna og útskýra straumrásir.
- beita mælitækjum í rafrásum til að greina bilanir og straumnotkun.
- vinna við einfalda rafmótora fyrir jafnstraum.