MLSU2MS04 - Málmsuða 3: pinnasuða, logsuða/-skurður, framhaldsáfangi

Lýsing

Málmsuða 3 -pinnasuða, logsuða/-skurður. Framhaldsáfangi 

Einingafjöldi : 4

Þrep : 2

Í áfanganum læra nemendur að umgangast gashylki, logsuðu- og logskurðartæki. Þeir læra að fylgja suðulýsingu, logsjóða plötujárn í suðustöðum PA, PC og PF með I-rauf. Nemendur fá þjálfun í að lóða og logskera fríhendis og bregðast rétt við ef hættu ber að höndum. Farið er yfir brunahættu vegna loga og neistaflugs, sprengihættu vegna áhrifa acetylens á eir og áhrifa súrefnis á olíu og feiti og vegna íláta sem innihalda eða hafa innihaldið eldfim efni. Farið er í undirstöðuatriði heilsuverndar, hlífðarfatnað og hlífar. Í áfanganum læra nemendur um helstu suðuaðferðir, efni og suðuvíra. Þeir öðlast færni til að meta aðstæður til rafsuðu og lærir hvernig gæta ber fyllsta öryggis við rafsuðu. Nemendur fá þjálfun í að sjóða plötur í öllum suðustöðum með pinnasuðu, samkvæmt staðlinum ÍST EN 287-1 og læra að skrá grunnatriði suðuferlislýsingar. Færni nemenda miðast við kverksuðu og grunnatriði suðuferlis og skulu þeir ná suðugæðum í flokki C samkvæmt ÍST EN 25 817. 

Þekkingarviðmið

Nemandi skal hafa öðlast þekkingu og skilning á:

  • mikilvægi hlífðarfatnaðar og hlífa ásamt heilsuvernd á vinnusvæði.
  • gashylkjum, meðferð þeirra við geymslu og flutning, litamerkingum og frágangi topploka.
  • notkunarsviði acetylens og súrefnis.
  • suðuloga, blöndu hans og hitastigi og áhrifum kolandi loga, súrefnisríks og hlutlauss loga á suðupollinn.
  • gerðum og samsetningu raufa og áhrifum þeirra á spennu og gildi ljósbogaspennu og tómgangsspennu.
  • ástæðum þess að ekki er hægt að logskera alla málma.
  • virkni lóða og lóðdufts.
  • stöðlum; ÍST EN 287-1 um hæfnispróf, ÍST EN 5 817 um mat á suðum og suðugalla, staðli um merkingu stáls, t.d. ÍST EN 22 553 og staðli um merkingu rafsuðuvíra.
  • helstu suðuaðferðum, afköstum þeirra, eiginleikum, hagkvæmni og takmörkunum við mismunandi efnisþykkt.

Leikniviðmið

Nemandi skal hafa öðlast leikni í að:

  • nota suðulóð og lóðduft.
  • setja upp mæla á hylki, slöngur og sköft.
  • sjóða 1 – 3 mm plötustál með I-rauf í PA, PF og PC.
  • stilla réttan vinnuþrýsting.
  • logskera stál fríhendis.
  • sjóða stúfsuðu í plötu í stöðum PA, PC, og PF.
  • meðhöndla búnað til suðu og nota hlífðarfatnað og öryggisbúnað.
  • sjóða saman hluti í ýmsum suðustöðum.
  • stilla suðutæki , þ.e. straum, spennu og viðnám og velja réttan suðuvír eftir verkefnum.
  • sjóða mismunandi legglengd og a-mál með einum eða fleiri strengjum.
  • rafsjóða lárétt á plötu beina strengi og með hliðarhreyfingum og rafsjóða kverksuður í PB- og PF- suðustöðum.

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • velja hlífðarbúnað og hlífar í samræmi við aðstæður.
  • stilla suðutæki í samræmi við notkun.
  • velja réttan vinnuþrýsting.
  • velja suðuspíssa samkvæmt efnisþykkt.
  • velja hagkvæmar og öruggar suðuaðferðir við mismunandi verk.
  • meta algengustu suðugalla og ástæður þess að þeir myndast.
  • meta suðugæði samkvæmt stöðluðum kröfum um útlit.
  • flokka suðu í gæðaflokka.