ÍÞRÓ1HL02 - Almenn heilsu- og líkamsrækt

Lýsing

Íþróttir : almenn heilsu – og líkamsrækt

Einingafjöldi : 2

Þrep : 1

Áfanginn er bæði bóklegur og verklegur. Hann felur í sér markvissa fræðslu um líkams- og heilsurækt. Nemandinn kynnist fjölbreyttum aðferðum þol-, styrktar- og liðleikaþjálfunar. Lögð er áhersla á rétta líkamsbeitingu við æfingar að nemandi finni hreyfingu við sitt hæfi út frá getu og áhuga. Áfanginn miðar að markvissri fræðslu um forvarnagildi líkams- og heilsuræktar og hvatningu til heilbrigðari lífshátta.

Þekkingarviðmið

Nemandi skal hafa öðlast þekkingu og skilning á:

• forsendum og áhrifum þjálfunar á líkama og heilsu.
• að reglubundin líkamsrækt er grunnur að góðri líkamshreysti.
• mikilvægi upphitunar, úthalds-, styrktar- og liðleikaþjálfunar.
• leiðum til að nýta líkams- og heilsurækt í daglegum athöfnum.
• æfingum sem bæta líkamsstöðu og hvernig beita á líkamanum rétt.
• fjölbreytilegum aðferðum til heilsuræktar.
• mikilvægi andlegrar, félagslegrar og líkamlegrar vellíðunar.

Leikniviðmið

Nemandi skal hafa öðlast leikni í að:

• auka úthald sitt, styrk og liðleika með fjölbreyttum aðferðum sem henta.
• stunda æfingar og hreyfingu sem stuðla að bættri líkamsbeitingu.
• stunda þjálfun og hreyfingu sem hefur áhrif á jákvæða upplifun og viðhorf til líkams- og heilsuræktar.
• beita samvinnu sem stuðlar að tillitssemi og hvatningu.
• nýta sér undirstöðuatriði líkamsbeitingar.

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

• styrkja jákvæða sjálfsmynd með þátttöku í almennri heilsurækt, leikjum og útiveru sem metið er með virkni, hugarfari og mætingu nemandans.
• gera sér grein fyrir gildi samvinnu í leik og keppni sem metið er með samskiptahæfni nemanda.
• sýna öðrum virðingu við leik, nám og störf sem metið er með hegðun og framkonu nemanda.
• glíma við fjölbreytt verkefni sem snúa að alhliða hreyfingu, líkams- og heilsurækt.
• leysa af hendi verkefni, æfingar og leiki sem viðhalda líkamshreysti sem metið er með þol- og styrktarprófi.
• nýta sér möguleika í að flétta reglubundna hreyfingu í daglegt líf og starf sem metið er með spurningalistum.
• nýta sér möguleika til heilsuræktar í nánasta umhverfi og úti í náttúrunni sem metið er með markmiðssetningu, dagbókarskrifum og sjálfsprófi.